پرپگلہ

                 

پرپگلہ  (دردو غم تامو موشہ پروا نیہ)

 دیروز برنامے روئی دیدنی ‘ پرپگلہ ‘ بود ۔ دلم کلو لوق لوق موکد کی بوروم ۔ مگر رفتہ نہ تنستوم ۔ البتہ تورائی دل خو دہ شکل نوشتہ برائی دوستا رئی کدوم کی دہ برنامہ خاندہ شود ۔ امو نوشتہ رہ بعد از کمگ ترمیم و اضافہ دہ خدمت دوستا تقدیم مونوم ۔

           ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

از کل پیشتر تشکر از عزیز فیاض و خانے ہزارہ گی اکیڈمی آباد کی مرہ ہم اوگل کدہ و دہ ای برنامہ دعوت ددہ تا قنجغے شوم چوقنئی تورہ بوگیوم ۔ گرچہ اینھا خودون شی ہم پئی موفتن کی “ما کجا و ادبیات وشاعری کجا؟” ای خو محبت جناب فیاض استہ کی فکر مونہ شاید ما بلے پرپگلہ یگو خیل نوشتہ میتنوم ۔ اگر راس پرسان کنین پر پگلے عزیز فیاض درحقیقت پر پگلے از مہ رہ بور کدہ ۔ سبب شی ای یہ کی غیدی کی ما امی کتاب رہ خاندوم کمگ احساس شرمندہ گی کدوم ۔ چرہ کی بسیاری از لفظائی ہزارہ گی کی زبوئی آتہ و آبے مہ استہ برائیم نو بود ۔ ۔ سریم درگ شود کی یقیناَ پس خاندگی خو پور موشت کدوم ۔ مثلاَ خودی لفظ پر پگلہ برایم نا بلد بود لہٰذا معنائی شی ازخود جناب فیاض پرسیدوم ۔ گوفت وقتیکی یک پرندہ میخایہ نو پرواز کنہ او پرپگلہ مونہ یا پرندہ کی میخیایہ خودہ از قید یا ازتائی چاقو آزاد کنہ او وقت ہم او پر پگلہ مونہ ۔

غیدی کہ کتاب رہ خاندوم ،احساس کدوم کی جناب فیاض ہر دو قسم کیفیات رہ بسیار دہ زیبائی و نوربندی د ہ شکل اشعاردہ مینے کتاب خو بیان کدہ ۔ مثلا وقتیکی موگیہ

سل ددہ بیدار کنی بیخی جوان و پیر خورہ ۔۔۔۔ جور کنی ازدیستی خود خو ای لیگڈ تقدیر خورہ

یگ بولوگ دیرہ کہ مو دہ قیدو بندو غم بودے ۔۔۔۔جائی ماخ مونٹی کنی بیخی دیگہ زنجیر خورہ

یا غیدی کی موگیہ

دیشاو د خاو خو دیدوم دنیا رہ آو گیریفتہ ۔۔۔۔ ہیچ کس دہ غم شی نیستہ بیخی رہ خو گیریفتہ

جیغ شور کدہ دویدوم گوفتوم کی بل شید از خو ۔۔۔۔ آغیل  رہ  یگمے توخ  کید کٹہ  ببو  گیریفتہ

عزیز فیاض بدون شک  یک شاعر با احساسہ کی از درد مردم خبرہ و از خاو رفتگی جامعہ رنج موبرہ ۔ او قد شعرائی خو میخایہ مردم رہ از خاو بیدار کنہ و میخایہ کہ دہ آو ایستاد سنگ اندختہ یک موج ایجاد کنہ ۔ او از مہاجرت و از دربدری نالہ مونہ ۔ او قصہ ہائی درہ کہ کشت و خون و قتل عام مردم رہ بیان مونہ ۔ او از رنگ خون سرخ ازو مردم تورہ موگیہ کی پشتی نان از خانہ بور موشہ و تیر بارو موشہ ۔ او از کورے خالیئ ازو مردم گب میزنہ کی میوے درخت شی دیگرو موخرہ ۔

عزیز فیاض تنہا قصہ ازشاوای تریک نہ موگیہ او از روز روشو ہم گب میزنہ۔او مردم رہ دلاسا مونہ کہ ای شاوائی تریک ہرچی درازبشہ آخیرتیرموشہ ۔

گرچی بلے مو آلی دونیا غدر سیایہ ۔۔۔۔ ارچن تریگ بشہ شاو از پس شی گسوبایہ   

او دہ مقابل نا امیدی از امید تورہ موگیہ ۔ دہ مقابل تریکی از روشنائی گب میزنہ و سیبتی موخرہ کی  روزائی بد آخیر شی تامو موشہ ۔

درد و غم  تامو  موشہ  پروا نیہ  ۔۔۔۔.  بار  میہ  تا  آقوبد  تیرما  نیہ

کو کی آرچن قرخ و پور لاڈو بشہ ۔۔۔۔ نیستہ اونتر کو کی درشی را نیہ

تورہ رہ کوتاہ کنوم ۔ پرپگلہ یک کتاب استہ کی پس خاندگی مو رہ دہ یاد مو میدیہ ۔ پرپگلہ چیمائی مورہ واز مونہ تاکی مو ازو قصہ ہا خبر شونی کہ دہ گردوگوشے مو پرتو استہ لیکن مو اونا رہ نمینگرنی ۔ پر پگلہ دہ گوش مو آزو میدیہ تاکی مو از خاو بیدار شونی ۔ پرپگلہ مو رہ دعوت میدیہ تا مو زنجیر و قپس خو میدہ کنی ۔ پر پگلہ تنھا یک کتاب شعر نیہ بلکی ای یک کتاب داستان ہم استہ کہ از دردو رنج مردم حکایت مونہ ۔ کتاب عزیز فیاض مثل یک چراغہ برائی کسائیکی میخایہ دہ زبوئی ہزارہ گی تورائی دل خو نوشتہ کنہ ۔ زبوئی ازی کتاب بسیار شیرینہ و بعد از خاندو احساس موشہ کی ای زبوئی بے خوندہ چی قدر شیرینی دشتہ بودہ ۔ ای کتاب یک امید میدیہ کہ ای زبو دیگہ بے خوندہ نہ خاد مند ۔ اشعاری عزیز فیاض ای قدر موسیقیت و ردم (Rhythm) درہ کی دل آدم میخایہ کی زبیتہ خاندہ بورہ ۔

ما دہ آخر نہ تنھا عزیز فیاض رہ تبریکی میدوم کی ایقس نوربند کتاب نوشتہ کدہ بلکہ ہزارہ گی اکیڈمی رہ ہم آفرین موگوم کی ای کتاب رہ دہ چاپ رسندہ ۔ میخایوم امزی فرصت استفادہ کدہ چند اشخاص و دوستائی قدر توئی دیگے خو ہم نام گیرگ کنوم کی دہ امزی راہ پیگ (Payag) میزنن ۔ جناب محمد علی اختیار ۔ رضا واثق ۔ سید جواد موسوی ۔ قادر نائل ۔ محمد علی تورانی ۔ یاسین ضمیر ۔ نسیم جاوید ۔ لیاقت آجیز و۔۔۔۔۔۔ کسائی استن کہ نہ تنھا از درد مردم تورہ موگین بلکی دہ شکل اشعار، زبونی شیرین ہزارہ گی رہ ہم برائی مردم معرفی مونن ۔ امی دوستا استن کہ ملل مردم رہ بور کدن و ثابت کدن کی زبوئی ہزارہ گی مثل دیگہ زبونائی دنیا شیرینی درہ و اگر دل رہ دہ راستی کنیم اشعار و ادب دہ ہزارہ گی ہم نوشتہ میتنیم ۔ بدون شک زبوئی ہزارہ گی امو قدر ظرفیت درہ کہ یگو میتنہ کی تورائی دل خو دہ ہزارہ گی ہم بوگیہ و ہم نوشتہ کنہ ۔ اومید مونوم کہ یک روز خاد اماد کہ تمام مردم ہزارہ نہ تنہا بلے زبوئی خو افتخار کنن بلکہ دہ امزی زبوئی شیرین نوشتہ ہم کنن  ۔

  تشکر

حسن رضا چنگیزی 

June 23, 2014