کانفرنس

کانفرنس  ۔ موضوع …….انسانیت

•میں علی حسین چنگیزی ہوں ۔ مجھے اس بات کی ہرگز پرواہ نہیں کہ کتنے بلوچ روزانہ بہیمانہ تشدد کے بعد مار دئیے جاتے ہیں ۔ مجھے اگر فکر ہے تو اپنے قتل عام کی ۔
•میرا نام واجہ غلام رسول ہے ۔ مجھے بھی اس بات کا زرہ برابر دکھ نہیں کہ ہزارہ کیڑے مکوڑوں کی طرح مار دئیے جاتے ہیں ۔ وہ تو ویسے بھی ہمارے سینے پر مونگ دلنے کے لئے آئے ہیں ۔ لہٰذا خس کم جہاں پاک۔
•مجھے خدائیداد خان کہتے ہیں ۔ مجھے کیا جو ہر دن بلوچوں کی مسخ شدہ لاشیں ملتی ہیں ۔ ہزارہ تو ویسے بھی قتل ہونے کے لئے پیدا ہوتے ہیں ۔ بس کاروبار چلتا رہے اور رہے نام اللہ کا ۔
•میرا نام چودھری اللہ دتہ ہے ۔ مجھے یقین ہے کہ بلوچستان اور کراچی کے مسائل تب تک حل نہیں ہو سکتے جب تک پورے پنجاب میں میٹرو بسوں کا جال نہیں بچھایا جاتا ۔
•مجھے دلبر سومرو کہتے ہیں ۔ مجھے نہیں پتہ کہ بلوچ ، ہزارہ اور پشتون کس جانور کے نام ہیں ۔ میں تو صرف ایم کیو ایم کو ہی جانتا ہوں ۔
•میرا نام سلیم احمد صدیقی ہے ۔ میری آپ سب کو بس اتنی سی نصیحت ہے کہ یا تو فوراَ سدھر جائیں اور بھائی کے ہاتھ پر بیعت کرلیں یا پھر اپنے لئے بوریاں تیار رکھیں ۔
•جیسا کہ آپ مجھے جانتے ہیں میں علامہ سالم ظاہری ہوں ۔ میرا خیال ہے کہ جب تک فلسطین کو آزادی نہیں ملتی ہم مسلمان غلام ہی رہیں گے ۔
•میرا نام حجت الاسلام شبیر علی مشہدی ہے ۔ میرا یہ ماننا ہے کہ ہم نہ بلوچ ہیں نہ سندھی ، نہ پٹھان نہ پنجابی بلکہ ہم صرف مومن اور خمینی کے پیروکارہیں اور مرتے دم تک رہیں گے ۔
•میں غلام فاروق معاویہ ہوں اور میرا ایمان ہے کہ پاکستان تب تک پاک نہیں ہو سکتا جب تک اسے شیعیوں کے وجود سے مکمل پاک نہیں کیا جاتا ۔
•میں ایک انسان ہوں اور میرے پاس کہنے کو کچھ نہیں ۔

قرارداد ۔۔
•اسلام زندہ باد ، پاکستان پائندہ باد